Shule ya Sekondari Panzua iliyoko kata ya Panzua Wilaya ya Kisarawe
mkoani Pwani, ina jumla ya wanafunzi 45 wa kidato cha kwanza hadi cha
nne.
Akizungumza na gazeti hili kwa njia ya simu kutoka wilayani humo,
Ofisa Kilimo wa kata hiyo, Muharami Makulika, alisema wanafunzi hao
wanatoka katika vijiji saba vinavyoizunguka kata hiyo. Alivitaja vijiji
hivyo kuwa ni Kibuyuni, Mkuruwili, Masanganya, Bupu kwa Wilaya ya
Mkuranga na Kisarawe kijiji cha Malegele na Bwama.
Alisema takwimu za mwaka jana zinaonyesha shule hiyo ilikuwa na
idadi ya wanafunzi 50 tu katika kidato cha kwanza hadi cha nne, jambo
linalosababisha kufa kwa elimu katika kata hiyo, huku wengi wao ambao ni
wa kike wakidaiwa kuolewa katika umri mdogo kutokana na wazazi na
walezi kushindwa kuwasomesha.
Kwa mujibu wa Makulika, wazazi na walezi wa wanafunzi wanaosoma
katika shule hiyo wamechangia kuhalalisha ndoa za wanafunzi hao kwa
kisingizio cha kipato kidogo kila mwaka, wakati baadhi yao kutokuwa na
mwamko kuhusu elimu kwa mtoto wa kike itakayomkomboa katika mnyororo wa
umaskini kwa siku za baadaye.
Alisema wazazi wa wanafunzi wanaosoma katika shule hiyo, wamegeuka
washawishi wakubwa kwa wanafunzi hao kufanya vibaya katika masomo yao ya
kuhitimu darasa la saba kwa dhamira ya kufeli ili wawaozeshe.
“Ni vigumu kutatua changamoto hii, labda ziingilie sekta binafsi
kama taasisi inayopambana na masuala ya ndoa za utotoni kama Chama cha
Wanahabari Wanawake Tanzania (Tamwa).
Ofisa kijiji wa kitongoji cha Kibuyuni katika kata hiyo, Idd
Ummagala, alisema takwimu za mwaka jana zinaonyesha idadi ya wanafunzi
katika shule hiyo walikuwa 54 na wengi wao hawakuhitimu masomo yao
kutokana na ndoa za utotoni.
Alisema takwimu hizo katika kipindi cha masomo cha mwaka huu, ni
chini ya mwaka jana kutokana na sababu mbalimbali zikiwamo za ndoa za
utotoni, hali duni ya wazazi na walezi. Kwa mujibu wa Ummagala, mkakati
wa serikali kwa 2016, ni kuiboresha shule hiyo ili iwe ya bweni kwa
lengo la kudhibiti wimbi la wanafunzi hao hususan wa kike wanaoangukia
ndoa za utotoni.
Akizungumza kwa niaba ya wazazi, Sharifa Abdallah, alisema idadi
kubwa ya wanafunzi wanaosoma katika shule hiyo, wanatoka katika familia
duni ambapo wazazi ama walezi wanaishi kwa kutegemea kilimo ambacho
hawawezi kukihudumia. Alisema wanakijiji wengi wa kata hiyo, wanategemea
fedha za kujikimu kupitia kilimo cha matunda, maharage na mahindi,
wakati wanakabiliwa na idadi kubwa ya watoto katika familia, jambo
linalochangia wengi wao kukatishwa masomo kutokana na rasilimali fedha.
“Pamoja na changamoto hiyo, lakini bado wanaume wengi hawana mwamko
kuhusu elimu ya mtoto wa kike, badala yake wanaendekeza mila potofu za
ndoa za utotoni huku wengine wakiona ufahari kuozesha mtoto katika umri
chini ya miaka 18.
Takwimu hizo ni miongoni mwa shule chache za kata zilizoko vijijini
zinazokabiliwa na idadi hiyo ndogo ya wanafunzi, lakini bado serikali
imeshindwa kutoa adhabu au kuweka sheria inayosimamia haki zao
kuhakikisha watoto wanapata elimu bora kwa maisha yao ya sasa na
baadaye.
chanzo. ippmedia.com
